កំណាព្យ =រយចាំមិនភ្លេច .....:
-ទូកនៅកំពង់រង់ចាំម្ចាស់ ម្តេចក៏អ្នកផ្លាស់ផ្តាច់និស្ស័យ ស្រពោនក្នុងចិត្តឥតឧបម័យ ម្តេចគ្មានអាល័យភ្លេចសន្យា។
-វត្តសសរ១០០ ជាសាក្សី ព្រះពុទ្ធសក្ខីក្តីស្នេហា សម្បថឥតន័យអស់ខ្លឹមសារ ភ្លេចអនុស្សាហ៍ សាងរួមគ្នា។
-ស្រណោះទូកតូច អុំកាត់បឹង បងនិងព្រលឹង យើងសន្ទនា រយលានពាក្យពេចន៍ ផ្អែមម្ល៉េះណា រាល់ពេលសន្ធយា សែនត្រជាក់។
-បងភ្លេចស្នាមក្តិច ភ្លេចលែងចាំ ស្នេហ៍ប្រែប្រេះស្រាំ ឈានបែកបាក់ រនោចគ្មានខែ ថែចិត្តស្ម័គ្រ អូនយំសស្រាក់ព្រោះឈឺចិត្ត។
-ស្នេហ៍ដូចជាផ្សែង ត្រសែតចោល ស្នេហ៍ដូចស្រមោល ឆ្ងាយលែងជិត និរាសក្តីស្មោះ សល់ក្បត់ផិត ព្រានចិត្តឧក្រិដ្ឋគ្មានមេត្តា។
-ធ្វើម្តេចអូនក្រគ្មានទ្រព្យធន មិនអាចផ្គាប់ផ្គុនប្រុសជីវ៉ា មានបេះដូងស្មោះ ជូនរៀមរ៉ា មិនឈ្នះដុល្លា បងលាស្រី។
-នឹកពេលណាត់ជួប ភ្លៀងធ្លាក់ខ្លាំង ចាំលុះភ្លៀងរាំង មិនឃើញថ្លៃ ចាំ ចិត្តរកាំ ចាំគ្មានន័យ កំពង់ទូកស្រី ស្មាលាហើយ។
-លា លែងជួបស្នេហ៍ ប្រុសមិនស្មោះ សូមអ្នកទៅចុះ ឈប់ឆ្លងឆ្លើយ ធ្នាក់ព្រានអប្រិយស្រីលាហើយ គុកកម្មឥតស្បើយស្នេហ៍អភ័ព្វ។
-ទឹកភ្នែកអូនហូរ លានតំណក់ ទឹកភ្នែកដែលស្រក់ តាងឈឺចាប់ ព្រះនាងកង្រីសុខចិត្តស្លាប់ តឹកតាងស្នេហ៍ភ្ជាប់គាប់ភក្តី។
-តែអូនមិនស្លាប់ព្រោះស្នេហ៍ក្បត់ លេបក្តីជូរចត់ ស្នេហ៍គ្មានន័យ អូនតស៊ូរស់ព្រោះម្តាយថ្លៃ ស្នេហ័ក្បត់ភក្តីស្រីលាហើយ។
0 comments:
Post a Comment