កំណាព្យ = សុបិនមួយ ..:::::
-បើសិនមានផ្ទះលើមាត់អូរ ស្តាប់សូរទឹកហូរសែនពិរោះ ខ្យល់ផាត់ត្រជាក់រែងសោមនស្ស ផ្ការាំង អួតឈ្មោះថាភក្តី។
-ផ្កាចារ រីកស្គាយពណ៌ក្រហម លួងលោមប្រលោមដល់ហឫទ័យ ក្រអូបគន្ធរសរំដួលព្រៃ គួចនឹកមមៃវ័យកុមារ។
-សម្លេងទឺកហូរកាត់ផ្ទាំងថ្ម ឮសូរឈូរឆ លាយវាតា យើងងូតទឹកលេងប្រឡែងគ្នា កញ្ជ្រោកទឹកថ្លាសប្បាយក្រៃ។
-ឯសត្វបក្សីខំអួតខ្លួន យោលស្លឹកអង្រួនលាន់ច្រៀវច្រៃ ប្រឡូកប្រឡែងឥតព្រួយភ័យ នៅក្នុងព្រឹកព្រៃឋានរមនា។
-បដិសណ្ឋារះភ្ញៀវទេសចរ សន្តិបវរហួសពណ៌នា ម្លប់ឈើត្រឈៃញ៉ាំងចិន្តា រីករាយឧវមាគ្មានអ្វីប្រៀប។
-ផ្តេកកាយណាយខ្វល់ សុខដុមពេក គន់មើលពណ៌មេឃរចនារៀប ពពកដេដាស់មានខ្ពស់ទាប សាងជាក្បួនកាព្យដល់កវី។
-បើសាកុណិកមិនមកក្បែរ សែនសុខម្ល៉េះទេដែនព្រឹក្សព្រៃ ម្រឹគីម្រឹគានិងបក្សី ស្វែងរកចំណីឥតកង្វល់។
-សំណាត់ស្លឹកឈើជ្រុះរាយប៉ាយ លាយឡំផ្កាព្រៃហូរមកដល់ យើងមុជទឹកលេងជ័យមង្គល ព្រោះផ្កាបានផ្តល់ក្លិនក្រអូប។
-ស្នាមញញឹមស្រស់លាយក្លិនផ្កា ពាសពេញកាយាមិនណាយស្រូប មហៃសូរស្នេហ៍ក៏មិនដូច ប្រាថ្នាចិត្តគួចដូចបំណង។
-ពេលបើកភ្នែកឡើងទើបដឹងច្បាស់ ខកចិត្តស្រឡះមិនដូចប៉ង គ្រាន់ជាសុបិនឆ្ងាយកន្លង តែសូមបន់ផ្សងឲ្យបានពិត។
0 comments:
Post a Comment