Night without moon
កំណាព្យ = រនោចគ្មានខែ
-ខែមួយចំណិតឥតរស្មី ដូចជីវិតស្រីជួបអន្ធការ លួងចិត្តខ្លួនឯងកុំទុក្ខា ធ្វើម្តេចវាសនាជួបអភ័ព្វ។
-មើលហ្វូងប្រវឹកគង់រីករាយ ឆាបឆ្វែលមិនណាយមើលត្រីខ្នាប់ ដួងខែរនោចហាក់ស្ងៀមស្ងាត់ រត្តិចរចាត់ ស្ងាត់សូន្យឈឹង។
-ក្បូនអើយៗក្បូនកាត់នទី ព្យុះគួចវក់វី ក្បូនគ្មានពឹង អណ្តែតត្រសែតបាត់លំនឹង ក្បូនប្រឹងសម្លឹងត្រើយកោះឆ្ងាយ។
-រាត្រីរនោចខ្លោចផ្សាចិត្ត អន្និច្ចាជីវិតកម្មតាមកាយ បញ្ញត្តសន្និវាសគ្រហឹមខ្ចាយ រែកពុនសម្ពាយឆ្ងាយក្តីគាប់។
-ឱ ភវាភព ម្តេចកម្រិត? ឲ្យមានជីវិត ពិតធុញថប់ ខំសាងកុសលក្រែងផ្តល់ភ័ព្វ តែប្រែអួអាប់ឥតរស្មី។
-ដួងខែរនោចគង់មានខ្នើត ខ្ញុំតាំងពីកើត ទល់តរុណី មិនដែលយល់ឡើយពេលរីករាយ ទោះពេចន៍លានស្តីក៏មិនអស់។
-ចង់ប្តឹងនឹងព្រហ្ម ម្តេចកម្រឹត? ទ្រង់ផ្តល់ជីវិតដែលក្រៀមក្រោះ ដូចជាធរណីគ្មានភ្លៀងសោះ ដូចផ្កាស្វិតខ្សោះអស់គន្ធា។
-វិនាសអស់ហើយក្តីសង្ឃឹម... ទាំងស្នាមញញឹម ធ្លាប់ស្រស់ថ្លា ទោះដួងខែខ្នើត ក៏អន្ធការ ពពកត្រៀបត្រាបាំងពន្លឺ។
-ដូចទឹកដែលហូរក្នុងសវន្តី មិនត្រឡប់វៃ បានត្រឹមឮ សម្លេងលួងលោមឲ្យស្បើយឬ? ស្អប់ជីវិត ឌឺ និរាសគាប់ .......!
រត្តិចរ =រាត្រីកាល
ភវាភព =ភពដែលកើតចាស់ឈឺស្លាប់
0 comments:
Post a Comment